Ermənistanın müdafiə naziri Seyran Ohanyan Sərsəng su anbarı ilə bağlı Avropa Şurası Parlament Assambleyasının (AŞPA) qəbul etdiyi qətnaməyə münasibət bildirib.

ANS-in məlumatına görə, Ohanyan qətnamənin ciddi qəbul edilməməsini məsləhət görüb. Müdafiə naziri jurnalistlər üçün keçirdiyi mətbuat konfransında bildirib ki, AŞPA-da qəbul edilən sənədlər yalandır.

Nazir Qarabağ separatçılarına "su siyasəti"ni davam etdirməyi məsləhət görüb. "Mən orada dəfələrlə olmuşam. Deyə bilərəm ki, Dağlıq Qarabağda həm Sovet İttifaqı dövründə, həm də indi su ilə bağlı kompleks işlər aparılır. İşlərin davam etdirilməsini məsləhət görürəm", - deyə Ohanyan bildirib.

Bu gün AŞPA-da Azərbaycan üzrə iki məruzə müzakirə dinlənilib. Məruzələrdən biri "Azərbaycanın sərhədyanı rayonlarının sakinlərinin qəsdən içməli sudan məhrum edilməsi" digəri isə "Dağlıq Qarabağvə Azərbaycanın digər işğal edilmiş ərazilərində zorakılığın artması" adı altında nümayəndələrə təqdim edilib.

Böyük Britaniyadan olan məruzəçi Robert Valterin hazırladığı "Dağlıq Qarabağ və Azərbaycanın işğal olunmuş digər ərazilərində zorakılıq hallarının artması" adlı hesabat lehinə 66, əleyhinə 70 nəfər, bitərəf 45 nəfər olmaqla qəbul olunmayıb.

Avropa Şurası Parlament Assambleyasının sessiyasında "Azərbaycanın sərhədyanı rayonlarının sakinlərinin qəsdən içməli sudan məhrum edilməsi" adlı məruzəsi qəbul edilib. Ermənistan və erməni diasporu "yalan" adlandırdıqları bu qətnamələrin qəbul olunmaması üçün aylardır mübarizə aparırlar.

Bundan əvvəl də AŞPA-da Azərbaycanın Tərtərçayın üzərində yerləşən Sərsəng su anbarı barəsində müzakirələri aparılıb. Həmin vaxt da "Azərbaycanın sərhəd rayonunun əhalisi sudan məhrum edilib" adlı qətnamə layihəsi qəbul edilmişdi.

Azərbaycanın əraziləri işğal olunmamışdan əvvəl Sərsəng su anbarından Tərtər, Bərdə, Yevlax, Ağcəbədi, Ağdam və Goranboy rayonlarının əkin sahələrinə su verilib.

Hazırda yuxarıda qeyd olunan 7 rayon Sərsəng su anbarının suyundan demək olar ki, istifadə edə bilmir. Ermənilər bir tərəfdən əraziyə gələn bütün çayları hədsiz dərəcədə çirkləndirir, digər tərəfdən isə imkan düşən kimi Azərbaycan ərazilərini tamamilə sudan məhrum etməkdən belə çəkinmirlər. İşğal olunmuş ərazilərdən gələn çaydan hər il onlarla partlayıcı maddələr tapılır. Su anbarı 1993-cü ildə Ermənistan ordusu tərəfindən işğal olunub.

Seyran Ohanyan isə qondarma rejim rəhbərliyinə qanunsuz əməllərini davam etdirməyi məsləhət görür. Yəqin ki, bundan sonra da qondarma rejim mərkəzi hakimiyyətin xüsusi dəstəyi ilə qanunsuz əməllərinə davam edəcək. Çünki ölkənin güc strukturunun rəhbəri rejim rəhbərliyinə hazırki "su siyasəti" ilə bağlı açıq dəstəyini ifadə edib.