"Freedom House" təşkilatının açıqladığı hesabat birbaşa Azərbaycana olan qərəz və nifrətdən irəli gəlir.

Bu sözləri Axar.az-a açıqlamasında QHT rəhbəri Niyaməddin Orduxanlı sözügedən təşkilatın hesabatına münasibət bildirərkən deyib. Onun sözlərinə görə, bu qurum hər zaman Azərbaycanın milli maraqlarının əleyhinə fəaliyyət göstərib:

"Hesabatda qeyd olunur ki, Azərbaycan "qeyri-azad ölkə"dir, Ermənistan isə "yarım-azad". Ermənistanda son prezident seçkilələrinin nəticələrinə etiraz edən minlərlə vətəndaş hakimiyyət qüvvələri tərəfindən gülləbaran edildi, rəsmi məlumata görə, onlarla mitinq iştirakçısı qətlə yetirildi; yüzlərlə etirazçı həbs edildi, döyüldü, təqib olundu. Bu gün Ermənistanda onlarla jurnalist, vətəndaş cəmiyyətinin nümayəndəsi və s. həbsdədir. Bu ölkədə təhdid altında olan, işgəncələrə məruz qalan ictimai fəalların Azərbaycana qaçdığının da dəfələrlə şahidi olmuşuq. Belə olan halda Ermənistan necə "yarım-azad ölkə", Azərbaycan "azad olmayan ölkə" ola bilər?"

N.Orduxanlı qeyd edib ki, bu cür qurumlar Azərbaycanın dövlət maraqlarına zərbə vurmaq üçün hər fürsətdən istifadə edir, bəlli dairələrin sifarişlərini, istəklərini yerinə yetirirlər:

"Bu təşkilatın rəhbərliyində olan şəxslər dünyada fəaliyyət göstərən erməni lobbiçiləri ilə yaxın münasibətləri ilə seçilirlər. Və bunu da Azərbaycan xalqı bilir, onların bizə qarşı qərəzli münasibətindən hər kəsin xəbəri var".

Xatırladaq ki, "Freedom House" beynəlxalq hüquq müdafiə təşkilatı 195 ölkədə təməl azadlıqların durumu ilə bağlı "2016-cı ildə dünyada azadlıqlar" adlı hesabatını açıqlayıb. Hesabatda Azərbaycan "qeyri-azad ölkə" kimi qeyd edilib. Təşkilatın bu acıqlaması Azərbaycanda vətəndaş cəmiyyəti nümayəndələri tərəfindən kəskin etirazla qarşılanıb.