Xocalıda, Qaradağlıda soyqırım törədən cinayətkarlar Ermənistanda önəmli vəzifədədirlər.

Axar.az xəbər verir ki, bu sözləri Türkiyənin Niğdə universitetində millət vəkili Qənirə Paşayeva deyib. Xocalı Soyqırımı ilə bağlı danışan deputat dünya türklərinə səslənib:

"24 ildir Xocalıda soyqırıma məruz qalıb qətl edilən qadınlarımız, uşaqlarımız gözləri gözlərimizin önündən getmir! Biz heç bir zaman, dünyanın heç bir yerində insanların öldürülməsinə tərəfdar olan bir cəmiyyət, millət olmadıq. Ancaq "Şarli Hebdo" üçün yürüş edən Qərb liderləri, yüzlərlə insan Ermənistan əsgərləri tərəfindən qətl edilərkən niyə yürüş keçirmədilər? Bu bir insanlıq utancıdır! Bu gün Xocalıda, Qaradağlıda soyqırım törədən cinayətkarlar Ermənistanda önəmli vəzifədədirlər. Dünya Ermənsitan tərəfindən 1 milyon insanın hüquqlarının pozulmasına səs çıxarmır. ATƏT-in Minsk Qrupu Ermənistana heç bir təzyiq göstərmir. Xocalı Soyqırımından danışmayanlar tarixdə olmayan, qondarma bir soyqırımı güclə qəbul etdirmək üçün Ermənistana və erməni diasporuna ciddi dəstək verirlər".

Millət vəkili eyni zamanda, türk gəncliyini Qarabağ həqiqətləri uğrunda fəal mübarizəyə və sosial şəbəkələrin təqdim etdiyi imkanlardan geniş istifadə etməyə çağırıb.

Tədbirin sonunda millət vəkili Q.Paşayevaya təşkilatçılar tərəfindən plaketlər təqdim olunub, həmçinin Xocalı Soyqırımı ilə bağlı film nümayiş etdirilib.