Türkiyənin Baş naziri Əhməd Davudoğlu "Əl-Cəzirə" telekanalına müsahibə verib.

Axar.az xəbər verir ki, Ankara teraktını hazırlayan terrorçuların cəzalanacağını deyən baş nazir Türkiyə-Rusiya, Yaxın Şərq böhranı və digər məsələrlə bağlı maraqlı açıqlama verib.

Qərarı biz verəcəyik

"Terrora necə və nə zaman cavab verəcəyimizi bilirik. Xalqımıza bu pisliyi edənlər, Türkiyəyə qarşı olanlar hesab verəcəklər. Ancaq nə zaman və necə olduğuna biz qərar verəcəyik. Bu olduğu zaman hər kəs Türkiyənin hər hücuma və təhdidə cavab verə biləcəyini görəcək.

Rusiya Suriya səmalarına nəzarət edirsə, Türkiyə də xalqın ürəyinə sahibdir. Suriya xalqının ürəyi bizimlədir və heç kim xalqı məğlub edə bilməz. Bu, başqa ölkələrdə də olub. Azezdəki son hücumlardan sonra YPG mövqelərinə zərbələr endirdik. Türkiyə sərhədi təhdid edilsə, bütün vasitələrdən istifadə edəcəyik. Əgər Türkiyəyə daha da çox qaçqın göndərmə cəhdi olsa, əlbəttə ki, Türkiyə mümkün olan hər şeyi etmək hüququna malikdir və hər cür tədbir alınacaq.

Peşman deyilik

Hər şeydən əvvəl hava sahəmizi qoruduğumuz üçün əsla peşman deyilik. Təbii ki, təyyarə vurulduğu vaxt onun Rusiya təyyarəsi olduğunu bilmirdik. Suriya rejiminə də aid ola bilərdi. Amma biz demokratik bir ölkəyik. Sərhədlərimiz və hava sahəmizi qorumaq üçün bir prosedur var. Ordumuza çox dəqiq təlimat vermişik: Türkiyə sərhədlərini kimliyindən asılı olmayaraq heç kim poza bilməz. Buna "nişan qaydası" deyirik.

Bu nişan qaydaları ilk olaraq 2012-ci ildə Suriya rejimi tərəfindən Türkiyə təyyarəsinə hücum olan zaman açıqlanmışdı. Buna görə də Suriya sahəsindən və ya havadan gələn hər hansı bir cism çox dəqiq bir təlimatla izlənilirdi. Bu hadisə isə 30 saniyədə oldu. Bu qədər müddətdə baş nazirə, yaxud nazirə məlumat vermək mümkün deyil.

Rusiyanın Suriyaya müdaxiləsindən sonra bunu yenilədik. Rusiyaya nişan qaydaları haqda və Türkiyənin ciddi bir ölkə olduğunu dedik. Biz bu hadisə olmadan öncə dəfələrlə rusları xəbərdar etdik. Bu hadisə zamanı isə pilota 10 dəfə xəbərdarlıq edildi. Digər tərəfdən, bu qırıcılar təkcə sərhədimizi pozmurdu, qarşı tərəfdə insanları bombalayırdı. Ümid edirəm ki, heç kim daha bu səhvi təkrarlamaz.

4 ildir davam edirdi

Türkiyə çox riskli bir bölgədə yerləşir. Problem Rusiya və Suriya ilə fərqli fikirlərə sahib olmağımızdan qaynaqlanmır. Oxşar fərqlilik son dörd ildir onsuz da vardı. Amma biz əlaqəmizi ən yaxşı şəkildə açıqladıq. Suriyada sülhün əldə edilməsi üçün nə edə biləcəyimizi dair Rusiya ilə birlikdə səy göstərdik.

Rusiya ilə əlaqələrimizi digər ölkələrlə olduğu kimi inkişaf etdirmək istəyirik. Bu səbəbdən indiyə qədər çox diqqətli olduq. Təəssüf ki, Rusiya tərəfi gərginliyi artırdı.

Hansı ərəb bizi müdafiə edəcək?

Suriya problemini birlikdə həll etməliyik. Amma hər şeydən əvvəl Suriya xalqı gəlir. Əfqanların Sovet İttifaqına qarşı mübarizə apardığı kimi. Əminəm ki, bir gün qəhrəman Suriya xalqı bütün bu qüvvələri məğlub edəcək və Türkiyə Suriya xalqı ilə birlikdə olacaq. Məndən soruşurlar ki, Suriyaya niyə müdaxilə etmirik. Çox əhəmiyyətli bir ərəb dövlət adamına bunu söylədim: Başikaya Mosulun azad edilməsi üçün hərbi təlim personalı və onları qorumaq üçün bəzi birliklər göndərdik. Ancaq Ərəb Liqası Türkiyəni qınadı. İndi bizə bu sualı verənlər dönüb özlərinə baxmalıdır. Hansı ərəb ölkəsi Türkiyənin etdiyindən daha artıq edib? Ərəb yoldaşlarımı müqayisə etmirəm. Əgər Suriyaya hərbi müdaxilə olsa, ərəb ölkələrinin bizi müdafiə edəcəyinə və dəstəkləyəcəyinə kim zəmanət verəcək?"