Müğənni Nadir Qafarzadənin İnstaqramdakı paylaşımı böyük qalmaqala səbəb olub.

Axar.az xəbər verir ki, mətbuatda Nadir Qafarzadənin şəhidlərə lənət oxuması ilə bağlı xəbəri dəqiqləşdirmək üçün xəbəri yayımlayan Big.az saytının əməkdaşları ilə əlaqə saxladıq. Saytdan bildirdilər ki, texniki səhv nəticəsində Nadir Qafarzadənin fikirləri təhrif olunub, əslində, müğənni "lənət" deyil, "rəhmət" yazıb.

Xəbər qısa müddətdə bir çox saytlarda yayımlanıb. Lakin sonradan Nadir Qafarzadə nə üçünsə sözügedən statusu silib.

Qeyd edək ki, paylaşımın altında İbrahim Qurbanov adlı şəxs Nadir Qafarzadəyə "sənin sənətinə böyük hörmətim vardı, amma bu gündən sonra..." deyə, küskün status yazıb. Bu rəy müğənninin başlanqıcdan "rəhmət" yox, "lənət" yazması və daha sonra paylaşımda düzəliş etməsi iddialarını gücləndirir. Üstəlik, skrinini təqdim etdiyimiz "rəhmət" yazılmış statusun silinməsi də təəccüb doğurur və o fikrə əsas verir ki, statusda əvvəlcə "rəhmət" yazılmayıbmış.