Rusiyalı politoloq Yevgeni Mixaylovun Axar.az-a müsahibəsi:

- ABŞ-ın Rusiyanın dərinliklərinə zərbə endirmək üçün uzaqmənzilli raketlərdən istifadəyə icazə verdiyi bildirilir. Bunu necə qiymətləndirirsiniz?

- Bayden Trampın Ukrayna ərazisində “sülh yürüşü” təşkil etməsinin qarşısını almaq üçün hər şey edir. Tramp deeskalasiya ilə bağlı qərarlarını açıqlayıb. Və bu fonda Bayden tez bir zamanda Ukraynaya 7 milyard dollar hərbi yardımı icra etməyə tələsir. Əgər Amerika faktiki olaraq uzaqmənzilli raketlərdən Rusiya ərazisini vurmaq qərarını təsdiqləsə, təbii ki, Britaniya və Fransa da öz silahlarına qoyulan məhdudiyyəti götürəcək. Almaniya isə qorxsa da, onların arxasınca düşəcək. Ümid edirəm ki, onların bunu etməmək üçün kifayət qədər beyinləri var, çünki Rusiyanın cavabı dəhşətli olacaq. Mən buna əminəm. Həqiqətən ümid edirəm ki, ehtiyatlılıq hələ də bütün bu cür düşüncələrə qalib gələcək.

- Bu, baş verərsə, Rusiyanın cavabı necə olacaq?

- Rusiya Federasiyasına zərbə endirilirsə, biz Vladimir Putinin sözlərini xatırlamalıyıq: “Cavab hərtərəfli olacaq”. Analoji uzaqmənzilli silahlarla Rusiyaya hücumlar isə NATO mütəxəssisləri tərəfindən həyata keçiriləcək. Yəni silahları NATO mütəxəssisləri idarə edəcək – Ukraynanın elə kadrları yoxdur. Putinin qeyd etdiyi kimi, Rusiya çox ağrılı və sərt cavab verərsə, sonradan inciməsinlər. Və bunu mükəmməl başa düşürlər.

- Dünya ictimaiyyəti ATACMS raketlərinin Rusiya ərazisinə mümkün hücumlarını necə qəbul edəcək?

- Nə amerikalılar, nə də avropalılar beynəlxalq ictimaiyyətin necə reaksiya verəcəyi ilə maraqlanır. Görünən odur ki, bu ölkələrdə hakimiyyətdə sabah nə olacağına əhəmiyyət verməyən insanlar oturub. İndi onlar üçün əsas olan qlobal hökumətlər və Amerika demokratları tərəfindən onlara verilən tapşırıqları yerinə yetirməkdir. Dünya ictimaiyyəti isə təbii ki, qınayacaq, təbii ki, sülhə çağıracaq. Və burada artıq genişmiqyaslı qarşılıqlı zərbələr mübadiləsi halında dünya ictimaiyyətinin necə reaksiya verəcəyinin heç bir fərqi yoxdur.

- Seçkidə qalib gəlmiş Tramp bunun qarşısını ala bilərmi?

- Zərbə vurularsa, bu, ümumilikdə Trampın Ukraynadakı problemin sülh yolu ilə həlli üçün bütün planlarını məhv edəcək. Onun səlahiyyətinin icrasına başlamasına 2 ay vaxt qalır. Və bu müddət ərzində o qədər çox şey dəyişə bilər ki, nəticədə Tramp heç nəyi düzəldə bilməz. Yenə deyirəm, həqiqətən ümid edirəm ki, qarşılıqlı zərbələr olmayacaq, Bayden zarafat edirdi, baxmayaraq ki, mən buna şübhə edirəm. Amerikalılar zərbə endirmək qərarına gəlsələr, hücuma icazə versələr, o zaman istərdim ki, Avropa liderləri kifayət qədər ehtiyatlı olsunlar. Çünki ehtiyatlı olmasalar, bildiyimiz Avropa artıq olmayacaq. Olmayacaq, bu, dəqiqdir.