Rusiya məhkəməsi azərbaycanlı keçmiş vəkilin həbs müddətini artırıb.

Axar.az xəbər verir ki, vəkil məhkəməyə polisin müşayiəti ilə gətirilərkən mübahisə yaşanıb. Belə ki, Paşayev qohumlarını salamlamaq istəyərkən polis əməkdaşını itələyib.

Bundan sonra polis əməkdaşı ona xəbərdarlıq etsə də, vəkil nalayiq ifadələr işlədib.

Tərəflər arasında sözlü atışma hakimin məhkəmə salonuna gəlməsinə qədər davam edib.

Məhkəmə E.Paşayevin həbs müddətinin mayın 15-dək uzadılması barədə qərar qəbul edib.

Qeyd edək ki, yanvarın 13-də Moskva Qarnizonu Hərbi Məhkəməsi Paşayevin həbs müddətini martın 15-dək uzadıb. Həmin iclasda məlum olub ki, keçmiş vəkilin şübhəli şəxs qismində cəlb olunduğu daha bir cinayət işi açılıb. Bu cinayət işi onun narkotik alverçisi Zaxarov soyadlı birisinə xüsusi hərbi əməliyyat zonasında rahat qalması vədi ilə bağlıdır. İddiaya görə, Paşayev Zaxarova dövlət mükafatı alacağına, sonra isə azadlığa buraxılacağına söz verib.

Xatırladaq ki, ötən ilin payızında Paşayevə qarşı Rusiya Federasiyası Cinayət Məcəlləsinin 159-cu maddəsinin 4-cü hissəsi (xüsusilə külli miqdarda dələduzluq) ilə ilk cinayət işi açılıb. İstintaqın versiyasına görə, 2024-cü ilin fevralında bloger Yelena Blinovskayanın əri Aleksey Blinovski ilə Moskvada şəxsi görüşü zamanı Paşayev onu inandırıb ki, külli miqdarda pul mükafatı müqabilində onları əvvəllər açılmış cinayət işi üzrə məsuliyyətdən azad edə bilər. Bu məqsədlə Paşayev Blinovskidən 18,5 milyon rubl və 300 min dollar pul alıb.