Azərbaycanla Ermənistan arasında sülh mətni üzərində razılaşmanın əldə edildiyi ötən ay açıqlandı. Məlum oldu ki, erməni tərəfi 2024-cü ilin yanvar ayına qədər Qarabağ mövzusunun sülh razılaşmasında əks edilməsinə çalışıb. Daha sonra isə Ermənistanın Xarici İşlər Nazirliyi bu mövzunun gündəlikdən çıxarıldığını bəyan etdi. Ona görə də sülhlə bağlı ilkin təminatlar məsələsində Azərbaycanın tələbi əsaslıdır.

Axar.az xəbər verir ki, bu sözləri Teleqraf-a politoloq Fərhad Mehdiyev sülh mövzusundan danışarkən deyib.

Onun fikrincə, ATƏT-in Minsk Qrupundan imtina ilə bağlı Bakının tələbi ciddi əsasa söykənir:

“Çünki Minsk Qrupunun məşğul olmağa çalışdığı münaqişə indi yoxdur. Hər iki tərəf bu məsələdə birgə addım atmalıdır. Sülh istiqamətində əldə edilən razılaşma əslində ciddi irəliləyişdir. Amma bu il sülh müqaviləsinin imzalanacağı ilə bağlı proqnoz vermək olmur”.

Politoloq hazırda geosiyasi şəraitdən asılı olan məqamların çox olduğunu söyləyib:

“Azərbaycan öz növbəsində prosesləri izləyir. Ermənistanla yekun sülh məsələsində Bakı tələb etdiyi məsələlərin həllini gözləməlidir. Bunun əksinə olacaq addım hərbi əməliyyatların başlamasıdır. Yenidən hərbi əməliyyatların başlanması ehtimalı isə çox azdır. Regional kommunikasiya xətlərinin açılması kimi addımlarla prosesdə vaxt qazanmaq olar. Zəngəzur dəhlizi məsələsində İrəvan nəhayət öz mövqeyini ifadə etməlidir. Çünki onlar Zəngəzur dəhlizinə razılıq verməsələr Ermənistan Orta Dəhliz konsepsiyasından kənarda qala bilər”.

“Ermənistan konstitusiyasından Azərbaycana qarşı ərazi iddialarını ehtiva edən müddəaların çıxarılması isə çətin proses kimi qəbul edilməməlidir. Konstitusiya dəyişilməz bir sənəd deyil”, - Fərhad Mehdiyev bildirib.