Azərbaycan Televiziya və Radio Verilişləri Qapalı Səhmdar Cəmiyyətinin sədri Rövşən Məmmədov Azərbaycan Dövlət Televiziyası, İdman TV və Mədəniyyət TV kanallarının yeni loqosunun mənasını açıqlayıb.

Kult.az xəbər verir ki, gənc sədr mavi, qırmızı və yaşıl üçbucaqlardan istifadə olunan yeni loqo barədə sosial şəbəkə hesabında məlumat paylaşıb.

R.Məmmədov bildirib ki, sadə, lakin kifayət qədər müasir formaya malik yeni loqonun elə bir o qədər də sadə rəmzi mənası var:

“Belə ki, üçbucağın hər bucağı konkret dövrü ifadə edir: keçmiş, bu gün və gələcək.

1-ci bucaq. Azərbaycan Televiziyası 63 illik zəngin tarixi keçmişə və özünəməxsus ənənələrə, inkişaf yoluna malikdir. Zaman dəyişsə, yeni zövqlər və tələblər meydana gəlsə də, biz tariximizə bağlıyıq və atdığımız hər bir addım məhz həmin ənənələrə, kökə söykənməlidir.

2-ci bucaq. Auditoriya uğrunda sözün əsl mənasında gərgin mübarizənin getdiyi müasir günümüzdə, biz zamanla ayaqlaşmalı və tamaşaçı zövqünə cavab verməliyik. Deməli, tarixiliklə yanaşı müasir tələblər də əsas götürülməlidir.

3-cü bucaq. Biz gələcəyə baxırıq və əsas hədəfimiz doğma kanalımızı yalnız Azərbaycanda deyil, MDB məkanında, regionda və bir qədər də qabağa gedərək, dünyada aparıcı informasiya vasitələrindən birinə çevirməkdir. Bu yolda dəstəyimiz - müstəqil Azərbaycan dövləti və yorulmadan çalışan böyük yaradıcı kollektivimizdir.

Beləliklə, yeni loqo özlüyündə keçmiş dəyərlərə hörmət, müasirlik və yeniliklə ayaqlaşma və gələcək hədəflərə doğru inamla addımlamaq mənalarını təcəssüm etdirir. Vətənimiz, millətimiz üçün xeyirli olsun”.