Paytaxtın Binəqədi və digər rayonlarında avtomobil yollarında quraşdırılan suötürücü avadanlığın dəmir barmaqlıqları naməlum şəraitdə oğurlanıb.

Daxili İşlər Nazirliyinin mətbuat xidmətindən Axar.az-a bildiriblər ki, həmin hadisələri törətməkdə şübhəli bilinən Təvəkkül Nuriyev və Seymur Əhmədov Binəqədi Rayon Polis İdarəsinin Cinayət Axtarışı Şöbəsinin əməkdaşlarının həyata keçirdikləri əməliyyat-axtarış tədbiri nəticəsində saxlanılıblar. Araşdırmalar zamanı həmin şəxslərin paytaxt ərazisindəki yollarda 26 suötürücü qurğunun dəmir barmaqlığını oğurladıqları müəyyən edilib. Saxlanılan zaman onlardan şəxsi istifadələri üçün əldə etdikləri narkotik vasitələr də aşkarlanıb.

Faktlarla bağlı Binəqədi Rayon Polis İdarəsində cinayət işi başlanılıb. Məhkəmənin qərarı ilə Təvəkkül Nuriyev və Seymur Əhmədov barələrində üç ay müddətinə həbs qətimkan tədbiri seçilib.