Balakəndə Türkiyə vətandaşının idarə etdiyi TIR-la minik avtomobili toqquşub, ölən var.

Axar.az APA-ya istinadən xəbər verir ki, hadisə axşam saat 19 radələrində Yevlax-Zaqatala-Gürcüstan sərhədi avtomobil yolunun Balakən rayonu Katex kəndi ərazisindən keçən hissəsində baş verib.

1976-cı il təvəllüdlü Balakən rayon sakini Kənan Abdulla oğlu Ağayevin idarə etdiyi “Mersedes" markalı 10 RO 610 dövlət nömrə nişanlı minik avtomobili ilə Türkiyə vətandaşı 1992-ci il təvəllüdlü Mustafa Makar Nurəddin oğlunun idarə etdiyi iritonnajlı TIR toqquşub.

Qəza zamanı "Mersedes" markalı avtomobilin sürücüsü K.Ağayev aldığı ağır xəsarətlərdən dünyasını dəyişib və onun meyiti sükan arxasında sıxılmış vəziyyətdə qalıb.

K.Ağayevin meyiti Zaqatala rayon Dövlət Yanğından Mühafizə Hissəsinin xilasediciləri tərəfindən çıxarılaraq əraziyə çağrılmış Balakən Rayon Mərkəzi Xəstəxanasının (RMX) Təcili Təxirəsalınmaz Tibbi Yardım şöbəsinin həkim briqadasına təhvil verilib.

Faktla bağlı araşdırma aparılır.