Çox vacib qələbə əldə etdik. Çempionatda bu cür oyunlarımızın sayı daha çox olmalıdır ki, inkişaf da olsun.

Axar.az xəbər verir ki, bu sözləri “Qarabağ”ın baş məşqçisi Qurban Qurbanov Misli Premyer Liqasının “Zəfər turu”nda “Neftçi”yə 2:0 hesabı ilə qalib gəldikləri oyundan sonra təşkil olunmuş mətbuat konfransında deyib.

O, “Neftçi”nin oyununda irəliləyişin olduğunu söyləyib:

“Kollektiv sanki biri-birini tamamlayır. Daha sistemli oyun nümayiş etdirirlər".

Mütəxəssis iki cəbhədə - həm Azərbaycan çempionatında, həm də Çempionlar Liqasında mübarizə aparmağın asan olmadığını deyib:

“İstər-istəməz futbolçulara yükləmələr çox olur. Həddindən artıq çox güc sərf edirlər. Bu barədə narahat oluram. Düzdür, futbolçularımızı qoruyub saxlamaq üçün bəzi matçlarda oyunun keyfiyyətini qurban vermişik. Amma çalışırıq ki, bu sistemə uyğunlaşaq”.

Qeyd edək ki, bu nəticədən sonra Qurban Qurbanovun komandası 23 xalla liderliyə yüksəlib, “ağ-qaralar” isə 15 xalla 7-ci sırada qalıb.