Bu gün Bakıda keçirilən DÇ-2018-in seçmə mərhələsində Azərbaycan-Almaniya qarşılaşmasından sonra baş məşqçilərin verdiyi açıqlama heç də oyundan az maraq kəsb etməyib.

Axar.az xəbər verir ki, Almaniya yığmasının baş məşqçisi Yoahim Löv oyundan razı qaldığını bildirsə də, daha yaxşı oyun gözlədiyini, başqa sözlə desək, komandasından narazılığını dilə gətirib. “Bundan da yaxşısını bacarırıq” deyən qalib komandanın baş məşqçisi Azərbaycan millisini də tərifləyib, 8 il əvvəlki ilə müqayisədə tam fərqli Azərbaycan yığması gördüyünü bildirib. “Müdafiəyə oturmur, əzmkar futbol göstərir, hücuma atılır. Norveçi məğlub edən komandadan söhbət gedir. Azərbaycan yığmasının bugünkü oyunu çox xoşuma gəldi. Ötən illərlə müqayisədə bu komanda çox inkişaf edib”, - Löv deyib.

Azərbaycan millisinin baş məşqçisi Robert Prosineçki isə möhtəşəm atmosfer olduğunu vurğulayıb və azarkeşlərə təşəkkür edib. Komandasından razılıq edən baş məşqçi “yaxşı, əzmkar oyun” nümayiş etdirdiklərini vurğulayıb.

“Komandamızla fəxr etmək olar” deyə qeyd edən Prosineçki belə rəqiblə çəkinmədən oynadıqlarını, maksimum güc ortaya qoyduqlarını bildirib.

Qeyd edək ki, Almaniya millisinin komandasından narazı qaldığı, Prosineçkinin isə öz komandası ilə fəxr etdiyi oyunda Almaniya millisi Azərbaycan millisini 4-1 udub.