İyunun 27-də Minsk-2019-un güləş yarışlarının üçüncü günündə Azərbaycanın qadın pəhləvanı Mariya Stadnik (50 kq) finala vəsiqə qazanıb.

Axar.az xəbər verir ki, Olimpiya Oyunlarının üçqat mükafatçısı, dünya və yeddiqat Avropa çempionu M.Stadnik yarımfinalda Türkiyə güləşçisi Evin Dəmirxanı məğlub edib. Güləşçimiz finalda Ukrayna təmsilçisi Oksana Livaç ilə qarşılaşacaq.

Azərbaycan Milli Olimpiya Komitəsinin (MOK) vitse-prezidenti Çingiz Hüseynzadə, MOK baş katibinin müavini Azər Əliyev və Azərbaycanın Belarusdakı səfiri Lətif Qəndilov güləşçimizin çıxışını izləyiblər.

Bu gün qadın güləşçilərimizdən Elmira Qəmbərova (62 kq) və Səbirə Əliyeva (76 kq) da finala vəsiqə uğrunda xalça üzərinə çıxacaqlar.