Tokio-2020 Yay Paralimpiya Oyunlarında açılış mərasimində Azərbaycanın bayraqdarı Oloxan Musayev olacaq.

Bu barədə Axar.az-a Milli Paralimpiya Komitəsindən məlumat verilib.

Bildirilib ki, paracüdoçu Ramil Qasımovun koronavirus testi müsbət çıxıb. Onunla yaxın təmasda olan cüdo komandasının digər 11 üzvündə PCR test nümunəsi neqativ çıxsa da, onlar da yüngül karantin rejiminə yerləşdirilib.

Cüdo komandasının digər üzvlərindən gündəlik test nümunələri götürüləcək. Yüngül karantinə yerləşdirilmiş idmançılarımız məşqlərinə davam edib, yarışlarda iştirak edə biləcəklər.

Lakin açılış mərasimində iştirak etmələrinə icazə verilməyib. 11 cüdoçu arasında ikiqat Paralimpiya Çempionumuz İlham Zəkiyev də yer alır. Bu səbəbdən açılış mərasiminin bayraqdarı Pekin Paralimpiya çempionu Oloxan Musayev olacaq.