İranın on illərdir ABŞ və İsrail kimi nüvə gücləri tərəfindən təhdid altında olmasına və nəticədə onların hücumuna məruz qalmasına baxmayaraq, Rusiya İrana Su-35 qırıcıları və ya S-400 hava hücumundan müdafiə sistemləri təqdim etməyib.

Axar.az xəbər verir ki, bunu İranın Almaniyadakı keçmiş səfiri və keçmiş nüvə müzakirəçisi Seyid Hüseyn Musəvian deyib.

“Eyni zamanda, Rusiya ABŞ-ın müttəfiqi olan Hindistana 117 Su-35M və tam texnologiya transferi ilə Su-57-lərin birgə istehsalını təklif edib. Bu, Moskvanı tənqid etmək anlamına gəlmir. O öz strateji maraqları çərçivəsində hərəkət edir. Türkiyə (NATO üzvü) və ya Səudiyyə Ərəbistanı (ABŞ-ın müttəfiqi) Su-35, Su-57 və ya S-400 istəsəydi, Rusiya çox güman ki, razılaşardı.

Bəlkə də məhz bu reallıq Tehrana beynəlxalq münasibətləri və milli maraqların əsl mahiyyətini daha yaxşı anlamağa kömək edir”, - deyə o bildirib.