Futbolçularımı təbrik edir, azarkeşlərimizə təşəkkürümü bildirirəm. Düzdür, texniki səhvlər və top itkiləri çox oldu, amma bunlar normal haldır.

Axar.az xəbər verir ki, bunu "Qarabağ"ın baş məşqçisi Qurban Qurbanov "Azersun Arena"da "Araz-Naxçıvan"a 2:0 hesabı ilə qalib gəldikləri Azərbaycan Premyer Liqasının XXXIV tur matçından sonra mətbuat konfransında deyib.

"Bəlkə də bu, bəzi oyunçuların ritmdən uzaq olmaları ilə əlaqədar idi. ümumilikdə yaxşı konsentrasiya var idi. Hər bir oyunçumuz meydanda 90 dəqiqə ərzində özünü yaxşı tərəfdən göstərməyə çalışdı, qalib gəlmək üçün xeyli güc sərf etdilər. Futbolçularımın oyuna yanaşmalarından razı qaldım. Rəqib həmkarım Elmar Baxşıyevə uğurlar arzulayıram", - 53 yaşlı mütəxəssis bildirib.

Baş məşqçi yerli klubların legionerləri arasında özünün diqqətini cəlb edənlərin də olduğunun etiraf edib. Lakin onun sözlərinə görə, həmin əcnəbilər çıxış etdikləri komandaların aparıcı üzvləridirlər:

"Bu səbəbdən, onları götürmək heç də asan olmayacaq. Ona görə də bura o qədər də ciddi yanaşmırıq. Bəzən insanda inam olur. Gözləyirsən, amma sonda alınmayanda bir az gec olur. Daha çox kənardan oyunçu götürmək istəyirik. Amma istənilən halda, hər bir legionerin çıxışını nəzərimizdə saxlayırıq. Sadəcə, hər bir klubun rəhbərlikləri ilə münasibətlər elədir ki, bəzən aramızda söhbət olanda "Bizim oyunçulara dəyməyin" deyirlər. Ona görə də yerli klublardan legioner götürmək inandırıcı görünmür".

Qurbanov transfer çalışmalarının çox rahat proses olmadığını vurğulayıb:

"Yekun olaraq, görüşür, ətraflı müzakirələr aparırıq. Amma biz ümumi iş rejimimizi mövsümün sonunda transfer çalışmalarına başlamaq üçün saxlamırıq. İşimizi, danışıqlarımızı mütləq şəkildə davam etdiririk. Hələlik qəti şəkildə kiminləsə danışıqları yekunlaşdırdığımız, razılaşdığımız oyunçu yoxdur. Amma yenə də vaxtımız var. Diqqətimizi qarşıdakı oyunlara yönəltmişik".