"Azərbaycan Respublikası Prezidenti cənab İlham Əliyevin müvafiq Fərmanı ilə təsdiq edilmiş "Neft və qaz gəlirlərinin idarəolunması üzrə uzunmüddətli strategiya"ya əsasən, neft və qaz gəlirlərindən daxilolmalar zirvə səviyyəsinə çatdıqda onların 25 faizdən az olmayan hissəsi yığıma yönəldilir".

Bu sözləri "Axar.az"a açıqlamasında Azərbaycan Dövlət Neft Fondununun mətbuat xidmətinin rəhbəri Cəmalə Əliyeva bildirdi. İqtisadçı ekspert Qubad İbadoğlunun neft gəlirlərinin idarəolunması strategiyasına əməl olunmaması ilə bağlı fikirlərinə münasibət bildirən fond rəsmisi qeyd etdi ki, neft və qaz gəlirlərindən daxilolmaların pik dövrü hələ başlamayıb.

Qeyd edək ki, Q.İbadoğlu bugünkü açıqlamasında neft gəlirlərinin idarəolunması strategiyasına əməl olunmadığını, Prezidentin 27 sentyabr 2004-cü il tarixli 128 nömrəli Fərmanı ilə təsdiq edilmiş "Neft və qaz gəlirlərinin idarəolunmasi üzrə uzunmüddətli strategiya"sının prinsiplərinin pozulduğunu, yığıma 25 faiz əvəzinə 9,4 faiz yönəldildiyini bildirmiş və Neft Fonduna irad tutmuşdu.