Gürcüstanın Baş naziri Georgi Kvirikaşvili BP şirkətinin Azərbaycan, Türkiyə və Gürcüstan üzrə regional prezidenti Qordon Birrell ilə "Şahdəniz-2" layihəsini müzakirə edib.

Baş nazirin dəftərxanasından AzərTac-a bildiriblər ki, oktyabrın 24-də keçirilən görüşdə əsasən BP-nin Gürcüstanda həyata keçirdiyi layihələr ətrafında fikir mübadiləsi aparılıb.

"Cənub" Qaz Dəhlizinin vacib komponentlərindən biri olan "Şahdəniz" layihəsinin ikinci fazasının genişləndirilməsi üzrə Gürcüstanda həyata keçirilən işlər də əsas müzakirə edilən məsələlərdən olub. 2019-cu ildə istifadəyə verilməsi nəzərdə tutulan bu layihənin Cənubi Qafqaz ölkələri üçün mühüm əhəmiyyət kəsb etdiyi xüsusi vurğulanıb.

Bildirilib ki, BP qaz kəmərinin Gürcüstan ərazisindən keçən hissəsinin maliyyələşdirilməsinə 2 milyard dollar sərmayə yatıracaq.