Azərbaycanın neft gəlirlərinin 2017-ci ildə proqnoz edildiyindən daha çox olacağı gözlənilir.

Axar.az xəbər verir ki, bu barədə Neft Araşdırmalar Mərkəzinin rəhbəri İlham Şaban “APA-Economics”ə bildirib. Ekspert gəlirlərin artım ehtimalına iki əsas faktorun təsir edə biləcəyini açıqlayıb:

“Birincisi, neft hasilatının heç də əvvəlki kimi 1,5 milyon ton, yəni gündəlik orta hesabla 30 min barrel civarında azaldılması baş verməyəcək. Hökumətin proqnozlarına görə, 2017-ci il üçün 39 mln 796,9 min ton neft hasilatı gözlənilir. Bu, isə cari illə bağlı korrektə edilmiş neft proqnozundan 948 min ton azdır.

İkincisi, gələn il üçün həm dövlət büdcəsinin, həm də Dövlət Neft Fondunun gəlirləri neftin orta illik ixrac qiyməti kimi 1 barrel üçün 40 dollardan hesablanıb. 2017-ci il üçün neft qiymətlərinin proqnoz göstəriciləri investisiya bankları, enerji agentlikləri, maliyyə qurumları və hasilatçı şirkətlər tərəfindən hazırda 50-65 dollar arasında qiymətləndirilir. Daha real qiymətləndirməni isə neft şirkətləri irəli sürürlər ki, bu da 53-55 dollar arasındadır. Yəni bu qiymətin aşağı sərhədi belə neft gəlirlərimizin proqnoz göstəricilərindən 32,5% çoxdur.

Cari ildə Azərbaycan neftinin orta ixrac qiyməti 45 dollar çıvarında olub. Ona görə də neft hasilatının azalması faktiki olaraq neft qiymətlərinin artımı ilə kompensasiya edilə bilər. Bunun üçün cari ildəki faktiki qiymətdən 23% qiymət artımı kifayət edər”.