Dünya neft bazarında cərəyan edən proseslər göstərdi ki, əgər Suriya, İraq və Səudiyyə-İran gərginliyi 7-8 il əvvəl olsaydı, neftin qiyməti onda 200 dolları keçə bilərdi.

Bu barədə Axar.az-a iqtisadçı ekspert Natiq Cəfərli açıqlama verib. Ekspert hazırkı gərgin iqtisadi-siyasi şəraitdə ABŞ-ın olduğu torpaqlara İranın hücum ehtimalının sıfıra bərabər olduğunu bildirib:

"Yaxın 2-3 ildə İrana təqribən 150-200 milyard dollara yaxın investisiyanın daxil olması gözlənilir. İran hazırda Səudiyyə ilə konflikti alovlandırmaqda maraqlı deyil. Çünki iqtisad maraqları daha öndədir. Sadəcə, iki ölkə arasında hazırda bir cəbhələşmə gedir və məzhəb savaşı daha da qızışır. Səudiyyənin ətrafında olan kiçik ərəb dövlətləri sünni cəbhəsində yer alaraq İrana qarşı ola biləcək sanksiyalarda iştirak etməyi düşünürlər. İranla Ərəbistan arasında iqtisadi əlaqələr demək olar ki, yox səviyyəsindədir. Bu, cəmi 60 milyon dollar təşkil edir ki, o da iqtisadi proseslərə heç bir təsir göstərə bilməz. Dünya neft bazarında cərəyan edən proseslər göstərdi ki, Suriya, İraq və İran-Səudiyyə gərginliyi 7-8 il əvvəl olsaydı, neftin qiyməti 200 dolları keçə bilərdi. Ancaq indi neft bazarı fundamental məsələlərə reaksiya verir".

İki ölkə arasındakı çəkişmələrin beynəlxalq müstəviyə qədər gedə biləcəyini deyən ekspert əlaqələrin yaxın zamanda düzəlməyəcəyini söyləyib:

"İlk baxışdan qəribə səslənsə də, Səudiyyə ilə İranın neft bazarındakı rəqabəti qiymətlərin aşağı düşməsinə səbəb olur. Çünki İran bazara daha aqressiv şəkildə çıxmaq istəyir. Səudiyyə isə İranın qarşısını almaq üçün artıq Avropa ölkələrinə büdcə qiymətlərindən də aşağı neft təklif edib. Yaxın 2-3 ildə İranın bütün neft yataqları tam gücü ilə işə düşərsə, gündəlik ən azı 6-7 milyon barel neft hasil ediləcək ki, bunu da Səudiyyə çox yaxşı bilir. Buna görə də Ər-Riyad indidən qiymətləri aşağı çəkir ki, İran öz mövqelərini qaytara bilməsin".