Bazar ertəsi kriptovalyutanın dəyəri düşüb. Bitkoin üçhəftəlik minimuma çatıb, efir isə sentyabrın əvvəlindən ən aşağı səviyyəyə enib. Qlobal ticarət müharibəsinin kabusu sərmayəçiləri riskli aktivlərdən imtinaya məcbur edib.

Axar.az xəbər verir ki, bu barədə “Röyters” agentliyi məlumat yayıb.

Bildirilir ki, dünyada ən böyük və ən məşhur kriptovalyuta olan bitkoin bazar ertəsi səhər Asiyada 94.476.18 ABŞ dollarına kimi geriləyib. Bu isə üçhəftəlik minimum olan 91,441.89 ABŞ dolları səviyyəsinə kimi enməyə yaxındır. Ondan aşağı pillədə olan efirin dəyəri isə 24 faiz düşüb. Bu kriptovalyuta sonuncu dəfə sentyabr ayının əvvəlində düşmüşdü.

Qeyd edək ki, həftəsonu ABŞ Prezidenti Donald Tramp Meksika və Kanadaya qarşı 25, Çinə qarşı isə 10 faizlik rüsum tətbiq edib.

ABŞ-ın ən böyük ticarət tərəfdaşları olan Kanada və Meksika təcili cavab tədbirləri görəcəklərinə söz vermişdilər. Çin isə Dünya Ticarət Təşkilatında Trampın rüsum qərarını mübahisələndirəcəyini bəyan etmişdi.