Sentyabrın 28-də, saat 14:00-da Qərb Universitetində dünya şöhrətli riyaziyyatçı alim Məsud Əfəndiyevlə görüş təşkil olunacaq.

Axar.az xəbər verir ki, "Elmlərin konvergensiyasi: gözlənilməz nəticələr" mövzusunda keçiriləcək tədbirdə universitetin professor-müəllim və tələbə heyəti iştirak edəcək.

Məsud Əfəndiyev Almaniya hökumətinin təsis etdiyi "Kiçik Nobel" sayılan "Aleksander fon Humboldt" mükafatını alan ilk azərbaycanlıdır.

1994-cü ildən Almaniyada yaşayan alim Münhen, Ştutqart, Berlin kimi nüfuzlu universitetlərdə dərs deyib. Hazırda H.Helmholts adına Münhen Elmi-Tədqiqat Mərkəzində "Dinamik sistemlər" şöbəsinin müdiridir. M.Əfəndiyev postsovet məkanında dünyanın altı aparıcı elmi jurnalının redaksiya heyətinin üzvü olan yeganə riyaziyyatçı alimdir.

Qeyd edək ki, görüş İstiqlaliyyət küç.31 ünvanında keçiriləcək. Əlaqə üçün: (012) 492-61-63, (050) 999-1991