Azərbaycan Yazıçılar Birliyinin üzvü Ramiq Muxtar Nərimanov Rayon Məhkəməsinin qərarı ilə 1000 manat məbləğində cərimə olunub. O, AYB-nin Mənzil Komissiyasının sədri Rauf Aslanovun şərəf və ləyaqətini alçaltmaq maddəsi ilə təqsirli bilinib.

Bu barədə Axar.az-a Rauf Aslanovun vəkili Şəmsi Vəfadar məlumat verib. O, Ramiq Muxtar haqqında cinayət işinin də açıldığını bildirib: "Rauf Aslanov şərəf və ləyaqətinin alçaldılmasına görə Nərimanov Rayon Məhkəməsinə müraciət etmişdi. Hakim Fuad Abdıyevin sədrliyi ilə məhkəmə keçirilib. Məhkəmə Ramiq Muxtarın 1000 manat cərimə olunması, özünün redaktor olduğu "Mizrab" jurnalında və "Reytinq" qəzetində təkzib verməsi, Rauf Aslanovdan və Azərbaycan Yazıçılar Birliyindən üzr istəməsi barədə qərar verib. Bununla yanaşı, Rauf Aslanovun şikayəti əsasında Binəqədi Rayon Məhkəməsində Ramiq Muxtara qarşı cinayət işi qaldırılıb. Buna səbəb isə onun Rauf Aslanova şər və böhtan atmasıdır".