"Kommersiya televiziyalarının yaratdığı mədəniyyətin əsiriyik".

Bu sözləri professor, televiziya tənqidçisi Qulu Məhərrəmli xalq artisti, muğam ustası Alim Qasımovun telekanalların musiqi siyasətinin biabırçı olması barədə fikirlərini şərh edərkən Axar.az-a deyib:

"Alim Qasımov kimi sənətkarları başa düşmək olar. Onlar daim səviyyələrini qoruyub saxlayır və bunu başqalarından da gözləyirlər. Sirr deyil ki, neçə müddətdir Azərbaycan televiziya məkanı zövqsüzlük problemi ilə üz-üzədir. Efirdə səviyyəsiz verilişlər verilir, zövqsüz mahnılar səsləndirilir. Bu cür "efir doldurulması"na heç kim nəzarət etmir. Bunun səbəbi hamımıza məlumdur – qeyri-peşəkarlıq və ümumi zövqün aşağı səviyyədə olması. Buna niyə senzura yoxdur? Senzura olmamalıdır da. Televiziya rəhbərləri, məsul şəxslər bu işlə məşğul olmalıdırlar. Əsas səbəb zəif mahnının və ifaçının meydana çıxmasındadır. Əvvəlcə, onun qarşısını almaq lazımdır. Amma artıq bundan keçib – bizdə kütləvi zövqsüzlük standart səviyyə formasına düşüb. Biz hazırda kommersiya televiziyalarının yaratdığı mədəniyyətin əsiriyik. Zövq, düşüncə, tərz buna uyğunlaşır. Biz bundan xilas ola bilmirik – bu bizim ümumi bəlamızdır". 

Qeyd edək ki, xalq artisti Alim Qasımov musavat.com-a müsahibəsində efirə verilən mahnıların 70-80 faizinin bayağı olduğunu demiş və bunu biabırçılıq adlandırmışdı.