Nə qədər güclü qadın olsam da, öz ayaqlarım üzərində dayanıb, maddi-mənəvi cəhətdən işlərimin öhdəsindən gəlsəm də, bəzən tükəndiyim və çarəsiz qaldığım zamanlar olur. Mənim də dizimi yerə qoyub, köks ötürdüyüm zamanlar olub. Digər qadınlar kimi, mənim də hisslərim, duyğularım var. Amma əsas odur ki, mən o çarəsizlik məqamlarını adlayıb, keçə bilirəm.

Kult.az xəbər verir ki, bu sözləri müğənni Damla Musavat.com-a müsahibəsində deyib. O, mərhum müğənni Şəfanın mahnılarını oxuyaraq məşhurlaşması haqda səslənən fikirlərə də münasibət bildirib:

“Xeyr, bu, doğru fikir deyil. Bəli, mən Şəfanın bir mahnısını oxumuşam, amma məhz onun mahnıları ilə sənətə gəlməmişəm, bu, yalandır. “O, mənəm” mahnısı ilə gəldim, daha sonra ardı-ardına mahnılarım çıxdı. Yaradıcılığında Damla artıq tanınırdı, bundan sonra Şəfanın mahnısını oxudu”.

Rusiyadan deportasiya olunması haqda da danışan müğənni bunun sifarişli şəkildə həyata keçirildiyini deyib:

“Səbəb kimi Rusiyaya çox giriş-çıxış etdiyimi, bu həddi aşdığımı göstərirdilər. Amma bu, sifarişli məsələ idi. Yəni sifarişlə mənə deport qoyulmuşdu”.