Diqqətə çatdırım ki, mən hərbi xidmətdə olmuşam.

Axar.az xəbər verir ki, bu sözləri müğənni Ceyhun Əliyev əməkdar artist Əli Mirəliyevin sözlərinə cavab olaraq sosial şəbəkədə yazıb. O, Əli Mirəliyevin sözlərindən təəssüf etdiyini bildirib:

"Təəssüf hissi keçirirəm ki, Əli müəllim tanıdı-tanımadı hamı haqqında eyni fikirdədir. Diqqətə çatdırım ki, mən hərbi xidmətdə olmuşam. Bir müddət arxa cəbhədə, daha sonra Füzulinin Əhmədbəyli kəndində ön cəbhədə hərbi xidmətimi başa vurmuşam. "Bu müğənnidir, hərbi xidmətə aparmaq olmaz və ya əlinə silah vermək olmaz" kimi üzərimdə hansısa fikir yürüdən olmayıb. Vətənə sevgi peşəylə ölçülmür. Cəsarətli və ya qorxaq insan sənət adamları arasında da, digər peşə sahibləri arasında da ola bilər.

Bəllidir ki, Azərbaycanın güclü ordusu var və hər bir əsgərimiz düşmənin önünə çıxa biləcək gücə malikdir. Əsgərlərimizə yetəri qədər təlimlər keçirilir. Mən bunun həm hərbi xidmət borcumu yerinə yetirəndə, həm də sənətçi kimi hərbi hissələrdə konsert verəndə şahidi olmuşam".

Xatırladaq ki, Əli Mirəliyev "Şou-biznesdən inanmıram kimsə cəbhəyə getsin. Hamısı qaçacaqlar. Şou-biznesdəkilər arvada bənzər kişilərdir", - deyib.