Avropa Yayımları Birliyi Avroviziya-2016 yarışması ilə bağlı Change.org saytında açılan petisiyaya münasibət bildirib.

Axar.az xarici mediaya istinadla xəbər verir ki, Birlik səsvermənin nəticələrinə yenidən baxılması barədə petisiyanın istəyini rədd edib. "Ukrayna qalibdir və bu nəticə dəyişməyəcək", - təşkilatçılar vurğulayıb.

"Razı olub-olmamağınızdan asılı olmayaraq, biz bu petisiyanı imzalayan şəxsləri müsabiqənin həqiqi və ədalətli nəticələrini qəbul etməyə çağırırıq", - Avropa Yayımları Birliyi qeyd edib.

Təşkilatdan həmçinin bildirilib ki, bu müsabiqədə yalnız bir şəxs qalib olur, amma hər zaman nəticəni qəbul etməyənlər və şəxsi fikir səsləndirənlər var.

Xatırladaq ki, Ukrayna təmsilçisi Camalə Krım tatarlarının sürgün edilməsini özündə ehtiva edən "1944" mahnısı ilə Avroviziya-2016 müsabiqəsinin qalibi olub. Bu qələbəni həzm edə bilməyən İrəvanda yaşayan Artur Ohanesyan sözügedən saytda petisiya başlatmışdı. Tələb olunan 35 min səs toplandıqdan sonra (hazırda petisiyanı 343 min şəxs imzalayıb) qurum bu istəyə rəsmi açıqlama bildirdi.