Ankarada boşanma prosesində olan ərinin bıçaqlı hücumuna məruz qalan Türkiyə Böyük Millət Məclisinin (TBMM) əməkdaşı Saliha Akkaş müalicə aldığı xəstəxanada vəfat edib.

Axar.az Oxu.az-a istinadən xəbər verir ki, iki gün əvvəl yaşanan hadisədə Saliha Akkaş evinə gələn, boşanma mərhələsində olduğu əri Salih Akkaşı içəri buraxıb.

Cütlük arasında başlayan mübahisə qısa zamanda dəhşətli hadisəyə çevrilib - Salih həyat yoldaşını boğazından bıçaqlayaraq ağır yaralayıb, daha sonra özünü tavandan asaraq öldürüb.

Hadisə yerinə çağırılan təcili tibbi yardım briqadası yaralı qadını dərhal xəstəxanaya çatdırsa da, onun həyatını xilas etmək mümkün olmayıb. Saliha Akkaş bu gün səhər saatlarında dünyasını dəyişib.

Qadının TBMM-də çalışdığı və iki uşaq anası olduğu bildirilir.

Faktla bağlı istintaq davam etdirilir.