İngiltərə və Uelsin Apellyasiya Məhkəməsi İran Milli Neft Şirkəti və Birləşmiş Ərəb Əmirliklərinin "Crescent Petroleum" şirkətinin işi üzrə aşağı instansiya məhkəməsinin qərarını qüvvədə saxlayıb.

Axar.az xəbər verir ki, bu barədə Britaniya mediası məlumat yayıb.

Məlumata görə, İran Milli Neft Şirkətinin Londonda dəyəri 100 milyon funt-sterlinq (təxminən 125 milyon dollar) olan binası müsadirə edilib.

"Mülk indi Britaniya məhkəmə sisteminin tam nəzarəti altındadır və ondan "Crescent"ə beynəlxalq arbitraj məhkəməsinin qərarında müəyyən edilmiş 2,4 milyard dollardan çox zərərin bir hissəsini kompensasiya etmək üçün istifadə edəcək", - məlumatda bildirilib.

Qeyd edək ki, “Crescent müqaviləsi” kimi tanınan iş 2002-ci ildə İran Milli Neft Şirkəti ilə Birləşmiş Ərəb Əmirliklərinin "Crescent Group"u arasında bağlanmış qaz tədarükü müqaviləsidir. Mübahisə İran Milli Neft Şirkətinin müqavilə üzrə öhdəliklərini yerinə yetirməməsi ilə başlayıb və bu, işin beynəlxalq arbitraja çıxarılmasına səbəb olub.