Teleqramın qurucusu və milyarder Pavel Durov öz kanalında 41 yaşını qeyd etmək istəmədiyini etiraf edərək, emosional paylaşım edib.

Axar.az xəbər verir ki, Durov dünyanın sürətlə azadlığını itirdiyini xatırladıb.

“Bizim nəsil əcdadlarımızın bizim üçün yaratdığı azad interneti xilas etməyə çalışmaqla vaxt itirir. Bir vaxtlar azad məlumat mübadiləsinin simvolu olan şey tam nəzarət alətinə çevrilir”, - o bildirib.

Durovun sözlərinə görə, bir vaxtlar demokratiyanın qalaları hesab edilən ölkələr getdikcə daha qaranlıq və repressiv texnologiyalar tətbiq edirlər:

“Böyük Britaniya rəqəmsal şəxsiyyət vəsiqələrini təqdim edir, Avstraliya onlayn yaş yoxlamasını tətbiq edir, AB isə şəxsi mesajları kütləvi şəkildə skan edir. Almaniya rəsmiləri internetdə tənqid etməyə cəsarət edənləri təqib edir. Böyük Britaniyada insanlar tvitlərə görə həbs edilir. Fransada azadlıq və şəxsi həyatın toxunulmazlığını müdafiə edənlərə qarşı cinayət işi qaldırılır”.

Durov vurğulayıb ki, bəşəriyyət “qaranlıq, antiutopik dünyaya” yaxınlaşır və əsas azadlıqları itirmək riski getdikcə reallaşır:

“Bizim nəsil azadlığa sonuncu sahib olan və könüllü olaraq onun əlindən alınmasına icazə verənlər kimi tarixə düşə bilər”.

O qeyd edib ki, müasir cəmiyyətə saxta dəyərlər tətbiq edilib və insanları tərəqqinin əcdadlarımızın bizə qoyub getdiyi hər şeyi: adət-ənənələri, şəxsi həyatı, suverenliyi, azad bazarı və söz azadlığını məhv etdiyinə inanmağa məcbur edirlər:

“Biz atalarımızın irsinə xəyanət etmişik və bu yol bizi özümüzü məhvə aparır - mənəvi, intellektual, iqtisadi və hətta bioloji”

Durov paylaşımını ad gününü qeyd etməyəcəyi ilə yekunlaşdırıb:

“Yox, bu gün qeyd etməyəcəyəm. Vaxtım daralır. Vaxtımız daralır”.

Qeyd edək ki, Pavel Durovun 10 oktyabrda 41 yaşı tamam olub.