Macarıstan Avropa Komissiyasının Rusiyanın enerji təchizatını dayandırmaq planı ilə sonadək mübarizə aparacaq və buna nail olmaq üçün bütün mövcud siyasi və hüquqi vasitələrdən istifadə etmək niyyətindədir.

Axar.az xəbər verir ki, bunu Lüksemburqda Avropa Birliyi Şurasının iclasında iştirak edən Macarıstanın xarici işlər və ticarət naziri Peter Siyarto bildirib.

O qeyd edib ki, Avropa Komissiyasının təşəbbüsü hələ də Avropa Parlamenti tərəfindən AB qanunu kimi təsdiqlənməlidir.

"Biz Macarıstanın enerji təhlükəsizliyini və aşağı kommunal qiymətlərimizi qoruyacağıq. Biz Brüsselin Macarıstan vətəndaşları üçün kəskin qiymət artımına məcbur etməsinə icazə verməyəcəyik. Biz macarların Ukraynaya görə kommunal xidmətlər üçün indi ödədiklərindən qat-qat artıq ödəniş etməsinə icazə verməyəcəyik. Ona görə də biz belə bir qanunun qəbulunun qarşısını almaq üçün bütün siyasi və hüquqi vasitələrdən istifadə edəcəyik".