Ukraynanın Qara dənizdə neft tankerlərinə endirdiyi son dron zərbələri və amerikalıların Karib dənizində bir tankeri müsadirə etməsi dönüş nöqtəsi olub. Bu hadisələr ABŞ və Ukraynanın Rusiya və Venesuelanın istifadə etdiyi “kölgə donanması”na qarşı sinxron təzyiqinin başlandığını göstərir.

Axar.az xəbər verir ki, bu barədə “Windward” şirkətinin dəniz kəşfiyyatı üzrə baş analitiki Mişel Vize Bokman “Foks Nyus” telekanalına açıqlamasında deyib.

Onun sözlərinə görə, “kölgə donanması” 1000-ə qədər neft tankerindən ibarətdir:

“Dünyada sanksiyalara baxmayaraq, İran, Venesuela və Rusiya xam neftini daşıyan təxminən 1000 gəmi var. Bu gəmilər həmin ölkələrin rejimləri üçün bir növ xilas xəttidir. Onlar neftin daşınması yolu ilə Ukraynadakı müharibənin maliyyələşdirilməsi üçün vəsait əldə etmək, həmçinin Maduro rejiminə qeyri-qanuni şəkildə pul axınını təmin etmək üçün istifadə olunur”.

Onun sözlərinə görə, indi ABŞ və Ukrayna bu gəmilərə hücum etməyə hazır olduqlarını açıq şəkildə göstəriblər:

“Bu, sanksiyalara baxmayaraq neft gəlirlərinin əldə edilməsində əsas rol oynayan “kölgə donanması”na qarşı mübarizədə yeni strategiyadır”.