Cənubi Koreyada yeniyetmələri zərərli kontentdən qorumaq üçün onların sosial mediadan istifadəsi qadağan oluna bilər.

Axar.az xəbər verir ki, bu barədə ölkənin Media Kommunikasiya Komissiyasının (KMKK) rəhbəri vəzifəsinə namizəd Kim Conq Çol bildirib.

O, deputatların Avstraliyada tətbiq olunan oxşar qadağanın Cənubi Koreyada da mümkünlüyü barədə sualını cavablandırarkən deyib ki, bu, tamamilə lazımlıdır.

Bununla belə KMKK açıqlama yayaraq vurğulayıb ki, Kim Conq Çolun fikirləri komissiyanın 16 yaşdan aşağı yeniyetmələrin sosial mediadan istifadəsini qadağan etməsini nəzərdə tutmur:

“Bu o deməkdir ki, biz valideynlərin və ya qanuni qəyyumların razılıq tələblərinin sərtləşdirilməsi də daxil olmaqla bir sıra siyasi alternativləri araşdıracağıq”.

Qeyd edək ki, bu yaxınlarda Avstraliya hökuməti yaşı 16-dan aşağı olanların İnstaqram, X və Tiktok da daxil olmaqla, sosial mediadan istifadəsinə qadağa qoyub. Hökumət sosial medianın uşaq və yeniyetmələrə mənfi təsirlərini, habelə onların kiber zorakılığa, onlayn fırıldaqçılığa və digər zərərli məzmuna məruz qalması narahatlığını əsas götürərək belə qərar qəbul etdiyini açıqlayıb.