Rusiya hökuməti Atlantik okeanında ABŞ Sahil Mühafizəsindən gizlənərək Venesuelaya doğru hərəkət edən neft tankerinin təqibinin dayandırılması tələbi ilə ABŞ-a rəsmi diplomatik sorğu göndərib.

Axar.az xəbər verir ki, bu barədə “Nyu York Tayms” nəşri yazıb.

Qeyd olunur ki, sorğu Yeni il ərəfəsində gecə saatlarında ABŞ Dövlət Departamentinə və Ağ Evin Milli Təhlükəsizlik Şurasına göndərilib. Rusiyanın ABŞ-dan gəminin təqibini dayandırmaq tələbi Ukrayna üzrə sülh danışıqlarına yeni bir nüans əlavə edə bilər.

Bildirilir ki, Amerika qüvvələri “Bella 1” adı ilə tanınan tankeri artıq təxminən iki həftədir izləyir. Sözügedən gəmini bir dəfə ABŞ Sahil Mühafizəsi saxlamağa çalışsa da, gəmi “saxlama əmri”nə tabe olmayaraq geri qayıdıb. Daha sonra isə gəminin göyərtəsində Rusiya bayrağı dalğalandırılıb və radio vasitəsilə sahil mühafizəsinə Rusiya nəzarəti altında olduqlarını bildiriblər. Gəmi bu yaxınlarda yeni “Marinera” adı ilə Rusiyanın rəsmi gəmi reyestrinə daxil edilib.

Anonimlik şərti ilə danışan amerikalı rəsmi bildirib ki, Tramp administrasiyası tankeri hələ də “dövlətsiz” hesab edir, çünki sahil mühafizəsi ona ilk dəfə yaxınlaşanda gəmi saxta bayraq altında hərəkət edirdi:

“Beynəlxalq hüquqa görə, “Bella 1” üçün Rusiyanın himayəsinin əldə edilməsi ehtimalı az olsa da, Rusiyanın diplomatik müdaxiləsi ABŞ-ın Venesuela ilə davam edən münaqişəsi fonunda tankeri ələ keçirmək cəhdlərini çətinləşdirə bilər”.

Qeyd edək ki, daha öncə "Bella 1" gəmisinin ABŞ tərəfindən saxlanıldığı xəbəri yayılmışdı.