Vaşinqton ABŞ Prezidenti Donald Trampa qarşı təhqirindən sonra Polşa Seyminin (parlamentin aşağı palatası) sədri Vlodzimej Çajasti ilə bütün əlaqələrini kəsmək qərarına gəlib.

Axar.az xəbər verir ki, bu barədə ABŞ-ın Varşavadakı səfiri Tom Rouz bildirib.

"Prezident Trampa qarşı təhqirlərindən dolayı Çajasti ilə heç bir münasibətimiz, əlaqəmiz və ya ünsiyyətimiz olmayacaq.

Biz heç kimin ABŞ-Polşa münasibətlərinə xələl gətirməsinə və ya Polşa və Polşa xalqı üçün çox şey etmiş ABŞ Prezidenti Donald Trampa hörmətsizlik etməsinə icazə verməyəcəyik", - Rouz vurğulayıb.

Qeyd edək ki, daha əvvəl Çajasti ABŞ Nümayəndələr Palatasının və İsrail Knessetinin spikerlərinin Amerika liderinə Nobel Sülh Mükafatı vermək təşəbbüsünü dəstəkləməkdən imtina etmişdi.