İranın "Doğru vəd-4” adlı qisas əməliyyatının ilk iki günündə 650-dən çox ABŞ hərbçisi ölüb və ya yaralanıb. Əməliyyat zamanı İran qüvvələri regiondakı Amerika bazalarına və hərbi gəmilərinə hücum edib.

Axar.az xəbər verir ki, bu barədə SEPAH sözçüsü briqada generalı Əli Məhəmməd Naeyni məlumat yayıb.

O bildirib ki, ABŞ Hərbi Dəniz Qüvvələrinin obyektlərinə və Bəhreyndə yerləşən hərbi qərargahına raket və pilotsuz təyyarə hücumları da daxil olmaqla, zərbələr nəticəsində ABŞ Hərbi Dəniz Qüvvələrinin “Abraham Linkoln” təyyarədaşıyan gəmisi İran sularından geri çəkilməyə məcbur olub:

“İran donanması İranın cənub-şərqində Çabahar sahillərindən təxminən 250-300 kilometr aralıda yerləşən “USS Abraham Linkoln”a dörd qanadlı raket atıb. Zərbələrdən sonra təyyarədaşıyan gəmi cənub-şərqi Hind okeanına doğru çəkilib”.

Sözçü İran qüvvələrinin Fars körfəzi bölgəsindəki ABŞ hərbi obyektlərinə ağır itkilər verdiyini vurğulayıb.