NATO-nun keçmiş baş katibi Yens Stoltenberq “Mənim rəhbərliyim altında: Müharibə dövründə NATO-ya rəhbərlik etmək” adlı kitab nəşr etdirib.

Axar.az xəbər verir ki, bu barədə “Baltic Sentinel” məlumat yayıb.

Stoltenberq Rusiyanın Ukraynaya qarşı tammiqyaslı təcavüzünün ilk aylarında Prezident Vladimir Zelenskinin xahişlərini yerinə yetirmədiyini yazıb. Kitabda o, Ukrayna prezidentinin NATO-dan hava hücumundan müdafiə yardımı istədiyi zaman ona qətiyyətlə “yox” cavabını verdiyini təsvir edib. O, həmçinin xatırlayır ki, 2021-ci ilin oktyabr ayının ortalarında Mərkəzi Kəşfiyyat İdarəsi onunla təcili görüş tələb edəndə Rusiyanın Ukraynaya hücum etmək niyyəti barədə ABŞ-dan kəşfiyyat məlumatları almışdı.

Stoltenberq həmçinin 2021-ci ilin payızında Rusiya xarici işlər naziri Sergey Lavrovla şəxsi görüşündən yazıb. O, etiraf edib ki, Polşa və Baltikyanı ölkələrin etirazları barədə məlumatlı olsa da, Lavrova Rusiya-NATO Şurasında Rusiyanın sərhəd bölgələrində bufer zonası yaratmaq və müttəfiq qoşunlarının 1997-ci ildən əvvəl mövcud olan mövqelərə geri çəkilməsi ideyasını müzakirə etməyi təklif edib, bu da Baltikyanı ölkələr üçün xoşagəlməz bir məqama çevrilib.