Rusiya Ukraynadakı tammiqyaslı müharibəyə son qoymağa hazır olduğunu nümayiş etdirməyincə, onunla dialoqa girməyin mənası yoxdur.

Axar.az xəbər verir ki, bu sözləri Litva Prezidenti Gitanas Nauseda deyib.

Nauseda qeyd edib ki, əgər Rusiya hərbi əməliyyatların dayandırılmasına razılıq verərsə, danışıqlar mümkündür:

"Hazırda Vladimir Putinlə təmaslar və ya danışıqlar üçün heç bir fürsət görmürəm, çünki inanıram ki, bu söhbətlər yalnız Rusiya müharibəyə son qoymaq istəyini açıq şəkildə nümayiş etdirdikdə başlaya bilər. Bunun çox sadə yolu var: hərbi əməliyyatları dayandırmaq, atəşkəsə nail olmaq və yalnız bundan sonra Kreml rejimi ilə istənilən məsələni müzakirə etmək mümkün olacaq".