NATO üzvü olan ölkələr iyulda Türkiyədə keçiriləcək sammit zamanı Ukraynaya 70 milyard avro həcmində yeni hərbi yardım paketinin ayrıldığını elan edə bilərlər.

Axar.az xəbər verir ki, bu barədə “Politico” nəşri Alyansdakı diplomatik mənbələrə istinadən məlumat yayıb.

Məlumata görə, təşəbbüs Almaniya tərəfindən irəli sürülüb. Təklifin məqsədi Ukraynaya ayrılan vəsaitlərin maliyyələşdirilməsini daha şəffaf etmək və üzv ölkələr arasında maliyyə yükünün bölüşdürülməsi ilə bağlı narazılıqları aradan qaldırmaqdır.

Bildirilib ki, iyulun 7-8-də Ankarada keçiriləcək NATO liderlərinin görüşündə Ukraynaya dəstək əsas müzakirə mövzularından biri olacaq.

Ukraynanın NATO yanındakı missiyasının rəhbəri Alena Hetmançukun sözlərinə görə, yeni yardım paketləri ilk növbədə Kiyevin hava hücumundan müdafiə sistemlərinə, uzaqmənzilli sursatlara, eləcə də pilotsuz uçuş aparatları və raket silahlarının istehsalının genişləndirilməsinə olan ehtiyaclarını qarşılamalıdır:

“Ukrayna effektiv təhlükəsizlik təminatları əldə edənədək yalnız tərəfdaşlarımızın təqdim etdiyi maliyyə zəmanətlərinə arxalana bilər”.

Qeyd edək ki, 70 milyard avroluq paketin 30 milyard avrosu Avropa Birliyinin daha əvvəl təsdiqlədiyi kredit proqramı hesabına, qalan 40 milyard avrosu isə ayrı-ayrı ölkələrlə Kiyev arasında ikitərəfli razılaşmalar çərçivəsində təmin ediləcək.