Ötən gecə Ukrayna PUA-ları Rusiyanın Stavropol diyarının Krasnodar və Nevinnomıssk şəhərlərindəki “Wildberries” logistika mərkəzlərinə hücum edib.

Axar.az xəbər verir ki, bu barədə şirkətin rəhbəri Tatyana Kim deyib.

O bildirib ki, endirilən zərbələr nəticəsində hər iki anbarda güclü yanğın baş verib:

“Dron hücumundan əvvəl əməkdaşların təxliyəsi həyata keçirilib, lakin hücum nəticəsində yaralananlar var”.

Rusiya regional əməliyyat qrupunun məlumatına görə isə Krasnodardakı anbarda üç nəfər xəsarət alıb. Nevinnomıssk şəhərində anbara edilən hücum nəticəsində beş nəfər yaralanıb. Krasnodarda və Dinskayada PUA-ların qalıqları iki çoxmənzilli binaya və bir fərdi evə dəyib, itki olmayıb. Eyni zamanda, 16-dan çox PUA yerli neft bazasına hücum edib, nəticədə 800 kvadratmetr ərazidə yanğın baş verib. Tələfat barədə məlumat yoxdur.

Qeyd edək ki, hücuma məruz qalan “Wildberries” anbarları şirkətin ən böyük obyektləri sırasındadır: Krasnodardakı 150 min kvadrat metrlik kompleks marketpleysin anbarları arasında 4-cü, Nevinnomısskdəki 120 min kvadrat metrlik mərkəz isə 6-cı yeri tutur.

Qeyd edək ki, Ukrayna “Wildberries”in müxtəlif regionlardakı nəhəng anbarlarına 17 iyuldan hücumlara başlayıb.