Rusiyanın Xarici İşlər Nazirliyinin mətbuat xidməti Polşa Səfirliyinin Rusiya Xarici İşlər Nazirliyinə çağırıldığı barədə məlumat verib. Məlumatda deyilir: "Varşavadakı Rusiya səfirliyi önündəki iğtişaşlarla əlaqədar Polşa səfirliyi Rusiya Xarici İşlər Nazirliyinə çağırılıb".

Əvvəl də qeyd etdiyimiz kimi noyabrın 11-i Varşavada Polşanın Müstəqillik günü ilə əlaqədar nümayiş keçirilib. Tədbirin iştirakçıları millətçi təşkilatlarının üzvləri və futbol azarkeşləri olub. Nümayiş əvvəlcə dinc xarakter daşısa da, sonradan maskalı gənclər Rusiya Federasiyasının səfirliyi önündə Rusiya ünvanına təhqiramiz sözlər deyərək binanı daş və asfalt qırıntıları ilə topa tutublar. Nümayişin dağıdılması üçün xüsusi təyinatlılar cəlb olunub. Hüquq-mühafizə orqanlarının əməkdaşları rezin güllələrdən və gözyaşardıcı qazdan istifadə edib. Onlarla insan həbs olunub.

Polşanın Xarici İşlər Nazirliyi Rusiya Federasiyası önündəki nümayişə görə üzrxahlıq bildirib.