Rusiya Liberal Demokratik Partiyasının sədri Vladimir Jirinovski Rusiya Dumasındakı iclası yarımçıq tərk edib.

Axar.az xəbər verir ki, Jirinovskinin belə addım atmasına səbəb Dumanın vitse-spikeri Sergey Neverovun etika komissiyasının Jirinovskinin çıxışlarını təftiş etməyə çağırması olub.

Belə ki, parlamentdə çıxışı zamanı siyasətçi öz partiyasından olan namizədlərin Moskva vilayətində təzyiqlərə məruz qaldığını bildirib. Bundan sonra Dumadakı deputatlardan biri liberal-demokratların liderinə sərt cavab verib. Jirinovski bunun əvəzində “Görürsünüz, Vahid Rusiya Partiyası nə edir? Onlar satılmış deputatlardır” deməklə opponentinə cavab verib. Daha sonra partiya lideri çıxışını davam etdirərək prezident seçkiləri zamanı Kremlə gələcəyini, bütün opponetlərini asacağını və güllələyəcəyini söyləyib. Bundan sonra o, təhqirlərini davam etdirərək, tribunanı tərk edib.

İnsident kulminasiya nöqtəsinə vitse-spiker Sergey Neverovun çıxışı zamanı çatıb. Neverov etika komissiyasından Jirinovskinin çıxışını təftiş etməsini xahiş edib. Neverovun dediyi sözlər Jirinovskini dayandırmayıb. O, Vahid Rusiya Partiyasının üzvlərinə qarşı təhqirlərini davam etdirib və daha sonra partiyanın bütün deputatları ilə birgə parlament zalını tərk edib.