Suriya prezidenti Bəşər Əsədə aid hərbi birliklərin müxtəlif şəhərlərdə müxaliflərə qarşı ağır silahlarla təşkil etdiyi hücumlarda ikisi uşaq olmaqla 56 adamın öldüyü bildirilib.

"Axar.az" Türkiyə mətbuatına istinadən xəbər verir ki, Suriya İnsan haqları Təşkilatından (SNHR) verilən açıqlamada rejim qüvvələrinin rəhbərlik əleyhdarlarının yerləşdiyi bölgələrə raket, top və döyüş təyyarələrindən təşkil etdiyi hücumlar nəticəsində Şam ətrafında 27, İdlibdə 11, Hələbdə 7, Dərədə 5, Rakkada 3, Deyruz Zorda 2 və Humusda 1 olmaqla ümumən 56 adamın öldürüldüyü bildirilib. Ölənlər arasında 14 Azad Suriya Ordusu (ÖSO) üzvü də var.

Suriya Yerli Koordinasiya Komitəsi (LCC) tərəfindən verilən açıqlamada da Əsəd qüvvələrinin paytaxt Şama müxaliflərin əlində olan Duma, Haresta, Bərzə, Yərmuq, Dareyya, Muaddamiyyə şəhərləri ətrafına və Şərqi Quta bölgəsinə ağır silahlarla hücum etdiyi bildirilib.

Silahlı müxaliflərin Şərqi Quta bölgəsində hökumət qüvvələrinin əlindəki bəzi nöqtələri ələ keçirdiyi bildirilən açıqlamada, Əsəd qüvvələrinin Kasyon Dağından müxaliflərin idarəsindəki bölgələrə top atəşi başlatdığı qeyd edilib.