Rusiyada prezident seçkisində saxtakarlıqlar olub, amma onun seçkinin nəticəsinə birbaşa təsir etdiyini söyləmək yanlış olardı.

Axar.az xəbər verir ki, bunu "Apostrof" saytına açıqlamasında Rusiya Dumasının eks-deputatı, mühacir siyasətçi İlya Ponomaryov söyləyib.

"Hansısa qubernatorlar öz yerlərini itirməkdən çox qorxurlar. Buna görə də onlar liderlərinə onlara tapşırılan regionların onu necə dəstəklədiyini göstərməyə çalışırlar. Belə bir şeyi biz Tümən və Saratov vilayətlərində gördük. Sibir regionlarında Putinə verilən əsl səslər bütün səslərin 70%-ni təşkil edir. Burada ən önəmli məqam Moskva və Sankt-Peterburqda baş verənlərdir. Buradakı seçkidə hakim partiya hər zaman mənfi göstərici əldə edib. İndi isə hər şey əksinə oldu. Peterburqda Putin 77%, Moskvada isə 72% səs topladı. Bu, Aleksey Navalnının seçkilərin boykot edilməsi kampaniyasının nəticəsi idi. Nəticədə o, məntəqələrdən müxalif seçiciləri apardı və burada yalnız hakimiyyətyönlü elektoratı saxladı. Buna görə də Putin 76% nəticə toplamaqda şəxsən Navalnıya borcludur", - deyə o bildirib.