Ukrayna Prezidenti Pyotr Poroşenko ABŞ Konqresində çıxışı zamanı Rusiya ilə apardıqları müharibənin ABŞ-ın da müharibəsi olduğunu deyib.

Axar.az xəbər verir ki, Ukraynanın şərqində davam edən müharibədə Rusiyanı günahlandıran Poroşenko Kremlin təcavüzkarlığına qarşı verdiyi dəstəyə görə ABŞ-a təşəkkür edib.

Ukrayna Prezidenti Krımın Rusiyaya ilhaqını əsla qəbul etməyəcəklərini bildirib:

"Ukraynanın yalnız ABŞ-la deyil, bütün dünya ilə birlik və həmrəylik içində olmağa ehtiyacı var. Ölkəmizi arxadan bıçaqladılar. Krımın ilhaqı müasir tarixin ən böyük xəyanətidir. Biz döyüşməyə hazırıq, ancaq bizlər sülh insanlarıyıq. Dünya yeni soyuq müharibənin astanasındadır, ancaq bundan qaçmaq mümkündür".

Poroşenko ABŞ-dan Ukraynaya NATO-nun xüsusi müttəfiqi statusunun verilməsini istəyib.