Dəhşətli partlayışın üzərindən uzun illər keçməsinə baxmayaraq, ərazidə bu gün də yüksək nisbətdə radiasiya təsbit edilir.

Axar.az xəbər verir ki, tarixin ən qorxunc nüvə qəzasının baş verdiyi Ukraynanın Çernobıl bölgəsi son illərdə minlərlə turistin diqqətini çəkməyə başlayıb.

Yemək yemək, siqaret çəkmək qadağandır!

Çernobılda qadağan olunmuş bölgəyə xüsusi icazə ilə girən insanlara yemək yeməmək, açıq havada siqaret çəkməmək, əşyalara toxunmamaq, oturmamaq və heç bir yerə əşya qoymamaq üçün hazırlanmış sənədə imza atdırılır.

Bu tapşırıqların hər biri qadağan olunan bölgəyə girən şəxslərin radiasiyaya məruz qalmaması üçün tətbiq edilib. Bu yerə radiasiya ölçən cihazla daxil olan insanlar təbii səviyyənin 0.12 olduğu halda bu ərazidə radiasiyanın 3.9 olduğunu bildirib.

Dəhşət saçan Pripyat…

Bura gələn ziyarətçilər fotoşəkillər çəkdikdən sonra nüvə stansiyasına 3 kilometr uzaqlıqda olan Pripyat şəhərinə yollanır.

Pripyat qəsəbəsi 1970-ci ildə Çernobılda işləyənlər üçün yaradılmış bir ərazi idi. Məhz bu səbəbdən nüvə stansiyasına yaxın yerdə inşa edilən ərazi partlayışdan sonra böyük radiasiyaya məruz qalıb. Alimlərin fikrincə, bu qadağan olunmuş bölgədə qarşıdakı 100 il boyunca yaşayışın olması mümkün deyil. Hadisədən sonra ərazidə təmir və təmizlik işləri aparmaq üçün qeydiyyatdan keçən 600 min könüllü insanın böyük bir hissəsi qısa bir müddətdə həyatını itirib. Bu insanların bir qismi isə radiasiyanın təsirindən övladlarına keçəcək gen pozğunluğuna məruz qalıb. Ümumilikdə 5 milyondan artıq insan radiasiyanın qurbanı olub.

Mənbələrdə 1986-cı ilin 26 aprelində baş verən fəlakətdən əvvəl bu bölgədə təxminən 50 min insanın yaşadığı qeyd olunub.

Kitablar, oyuncaqlar və yüzlərlə əleyhqaz…

Zamanın dayandığı şəhərin binalarında Sovet dövründən qalma lövhələr, qapısı açıq qalan mənzillərdə kitablar, oyuncaqlar və bir məktəbin bufetindəki yüzlərlə əleyhqaz fəlakətə düçar olan insanların vəziyyətini göz önünə gətirir.

4 nömrəli reaktor

Çernobıl nüvə stansiyasının 4 nömrəli reaktorunda baş verən partlayışın təkcə Ukraynada 2.3 milyon insanı radiasiyaya məruz qoyduğu bildirilib. Yaşanan bu bədbəxt hadisə yüz minlərlə insanın həyatını itirməsinə və müxtəlif xəstəliklərin yayılmasına səbəb olub.

Hadisədən sonra partlayan nüvə reaktorunun üstünün bağlanması üçün 250 min ton betondan istifadə edildiyi açıqlanıb.

Həyatlarını təhlükəyə atanlar və fotolar…

Qadağan olunmuş bölgəyə gizli yollarla icazəsiz şəkildə girən ukraynalı gənclərin ərazidə çəkdiyi fotoşəkilləri oxuculara təqdim edirik.