Dünən bölgəmizdə iki illik Qəzza soyqırımını dayandırmağa yönəlmiş mühüm bir addım atdıq, liderlər olaraq Misirdə güclü siyasi iradə ortaya qoyduq.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan deyib.

“Şarm əş-Şeyxdə keçirilən görüşdə də liderlərlə birlikdə eyni iradəni nümayiş etdirdik. ABŞ Prezidenti cənab Donald Tramp, Misir Prezidenti cənab Əbdülfəttah əs-Sisi və Qətər Əmiri Təmim bin Həməd əs-Sani ilə birlikdə imzaladığımız dördtərəfli bəyanatın bölgəmizdə daimi sülhə aparan yolda yeni bir mərhələ olacağına ümid edirəm.

Bu gün Qəzzada hər nə qədər içimizdə bir kədər qalsa da, uşaqların üzündə gülüş var. Hər kəs Allaha dua edir. Analar isə iki ildən sonra ilk dəfə uşaqlarını küçəyə, başlarına bomba düşəcək qorxusu olmadan göndərə bilirlər. Sadəcə bunları görmək belə bizim üçün böyük bir xoşbəxtlikdir”, - Ərdoğan bildirib.