Gürcüstanın keçmiş dövlət təhlükəsizliyi naziri İqor Qiorqadzenin Tiflisin Luqara laboratoriyasındakı təhlükəli sınaqlar haqqında yaydığı məlumatlar sadəcə aysberqin görünən hissəsidir.

Axar.az xəbər verir ki, bunu “Sputnik Gürcüstan”a açıqlamasında Gürcüstanın eks-prezidenti Mixail Saakaşvilinin eks-müşaviri Cefri Silverman deyib. Onun sözlərinə görə, Tiflisdə Luqara laboratoriyasından əlavə Tiflisdə Eliava laboratoriyası da var.

O, Kobuletidə də laboratoriyanın olduğunu və burada Britaniya Müdafiə Nazirliyinin nəzarəti altında bubonik vəbanın tədqiq edildiyini bildirib:

“Bundan başqa daha 11 kiçik laboratoriya mövcuddur. Bütün bu mərkəzlər bir-birləriylə bağlıdırlar. Luqara əsasdır, amma bu o demək deyil ki, tədqiqatlar təkcə burada aparılır. Kutaisidə bubonik vəba, antibiotiklərin hazırlanmasıyla bağlı eksperimental proqram üzərində iş aparılır. Üstəlik, laboratoriyalarda yeni növ bakteriya və viruslar üzərində tədqiqat aparılır. Bütün bu laboratoriyalar ABŞ-ın hərbi proqramlarıyla bağlıdır”.

O, Gürcüstanda belə laboratoriyaların tikilməsiylə bağlı kontraktların ABŞ Hərbi Dəniz Qüvvələri tərəfindən hazırlandığını da iddia edib:

“ABŞ HDQ nümayəndələri Gürcüstan İqtisadi İnkişaf Nazirliyinin nümayəndələri ilə görüşəndə onlar çamadanı açıb, yalnız bunu dedilər: “Kontrakt budur, imzalayın”. ABŞ-ın belə addımına səbəb Gürcüstanın strateji bölgədə yerləşməsi idi. Belə ki, Gürcüstan İran, Rusiya, Türkiyəyə yaxın yerləşir, digər tərəfdən isə cəmiyyət burada həyata keçirilənlərlə bağlı heç bir sual verməyəcək. Gürcüstan həmçinin bakterioloji silahların ləğvi ilə bağlı konvensiyanı təsdiq etməyib. Onun bioloji silahı yoxdur, amma sovet dövründən tədqiqat mərkəzləri mövcuddur. Amerikalılar dedilər Gürcüstanı qoruyacaqlar ki, patogenlər pis əllərə düşməsin. Bunun sayəsində Gürcüstan böyük laboratoriya oldu”.