Rusiya sərhədçiləri Koreya Xalq Demokratik Respublikasına (KXDR) məxsus iki gəminin və 11 motorlu qayığın heyət üzvləri olan ümumilikdə 160 nəfəri saxlayıblar.

Axar.az xəbər verir ki, hadisə Yapon dənizinin Rusiya məxsus hissəsində baş verib. Rusiya Federal Təhlükəsizlik Bürosunun ictimaiyyətlə əlaqələr mərkəzinin məlumatına görə, KXDR vətəndaşları və sərhədçilər arasında yaralananlar var.

Hadisənin səbəblərinin araşdırılması üçün KXDR-in Rusiyadakı müvəqqəti işlər vəkili Xarici İşlər Nazirliyinə çağırılıb.

Sərhədçilər koreyalı brakonyerlərdən balıq ovu üçün qadağan edilmiş tilovlar götürüblər. Saxlanılan şəxslər Naxodka limanına aparılıb.

Qeyd edək ki, bu barədə ötən gün yayılan ilkin məlumatda rus sərhədçilərdən 3 nəfərin atışmada yaralandığı bildirilmişdi. Rusiyalı senator Frants Klintseviç isə Şimali Koreyadan olan brakonyerlərlə bu toqquşmanın iki ölkə arasında münasibətlərə təsir etməyəcəyini, ancaq brakonyerlərdə silah-sursatın olmasının "böyük suallar doğurduğunu" qeyd etmişdi.